01
қыркүйек
2023
Білім күні
М.Мәметова атындағы № 13 жалпы орта білім беретін мектебінде 1 қыркүйек - Білім күніне орай «Әділетті Қазақстан: сапалы білім, адал ұрпақ, табысты ұлт» атты салтанатты жиын өтті. Жиынға аудандық білім беру бөлімінің әдіскері Сақыбай Айбек Қайратұлы, ауыл имамы Көпбосынов Асхат Мүсіретбекұлы, қамқоршылық кеңесі мүшелері, ардагер ұстаздар қатысты.
Алғашқы құттықтау сөз мектеп директорының уақытша міндетін атқарушы Қали Әшімханұлына берілді. Ол өз сөзінде былтырғы оқу жылының жетістіктерін атап өтіп, биылғы оқу жылындағы атаулы даталарға тоқталып, салтанатты жиынға қатысушыларды мерекемен құттықтады.
2023-2024 оқу жылында 29 оқушы мектеп табалдырығын аттап отыр. Қонақтар бүлдіршіндерге жылы лебіздерін білдіріп, жаңа оқу жылына толағай табыстар тіледі. Сондай-ақ салтанатты жиында аудандық білім бөлімінің әдіскері А.Сақыбай қазақ тілі мен әдебиеті пәнінің мұғалімі М.Каринбаеваға оқу ағарту министрі Ғ. Бейсембаевтың Құрмет грамотасын табыстады.
Бөбек пен түлек жұп болып, алғашқы қоңырау соғылып, салтанатты жиын өз мәресіне жетті.
Соңынан оқушылар «Әділетті Қазақстан: сапалы білім, адал ұрпақ, табысты ұлт» атты алғашқы тәрбие сағаттарына шақырылды.
